No boletim em latim de hoje: o Papa Leão XIV celebrou a primeira Missa do ano; as Vésperas da Solenidade de Maria Santíssima, Mãe de Deus, e o Te Deum; a última Audiência Geral de 2025.
HEBDOMADA PAPÆ
Notitiæ Vaticanæ latine redditæ
Die tértio mensis Ianuárii anno bismillésimo vicésimo sexto
TITULI
Prima Missa anni. Die primo mensis Ianuárii, féria quinta, Papa adhortátur, ut vivámus líberi libertátem afferéntes, ditáti vénia veniámque largiéntes, sine voluptáte ac metu cor spirítui fraternitátis dilatántes.
Ante caput novi anni, Leo Quartus Décimus suétas Primas Vésperas celebrávit in sollemnitáte Sanctæ Dei Genetrícis Maríæ cum cantu Te Deum.
Postréma Audiéntia Generális anni. Papa monet, ut consciéntiam ad véniam peténdam perscrutémur.
Salútem plúrimam ex corde dicit Xaverius Sartre ómnibus vobis, qui optáti audítis núntios Latína lingua prolátos.
Clique para ouvir o boletim em latim
NOTITIAE
In sollemnitáte Sanctæ Dei Genetrícis Maríæ, Papa prǽfuit Missæ in Basílica Sancti Petri die primo mensis Ianuárii celebrátæ, Undesexagésimo Die Mundiáli Pacis, coram quinque mílibus quingéntis fidélium. Celebrátio ex pace iam ab actu pænitentiáli cónstitit. Refert Eugenius Murrali.
Annus novus, vita nova: redintegrátio, sicut illa populi Ísrael a servitúte liberáti. Litúrgia, ut Leo Quartus Décimus explicávit, nos commonefácit omnem diem unicuíque nostrum esse posse vitæ novæ inítium, gratuíti Dei amóris eiusdémque misericórdiæ et responsiónis libertátis nostræ grátia. Ad núntium suum rédiens pro pace, Summus Póntifex mémorat mundum neque acuminátis gládiis salvári neque senténtiis neque oppressióne, neque exstínctis frátribus, sed pótius ex indefésso stúdio intellegéndi, ignoscéndi, liberándi et omnes suscipiéndi, sine voluptáte ac metu. Papa dénique nos adhortátur, qui, præsépi appropinquántes, reminiscámur mirabílium, quæ Dóminus fecit, ac rursus póstea iter ineámus, sícuti húmiles testes spelúncæ.
Hestérno die, último anni bismillésimi vicésimi quinti, Papa, in Vésperis, commorátus est in humánis propósitis, quæ longe distant a consíliis divínæ sapiéntiæ afflátu concitátis. De his lóquitur Sílvia Guidi.
Leo Quartus Décimus necessitátem expréssit propósiti sapiéntis, benígni, misericórdis, necnon líberi ac liberántis, pacífici et fidélis, sícuti illíus Maríæ Vírginis. Quéritur autem ratiónes, quæ mercátibus, territóriis ac spátiis auctoritátis student potíri: ratiónes armis prǽditas, fictis sermónibus, præiudicátis cogitatiónibus et vanis arguméntis religiósis occultátas. Hæc propósita longe distant ab illis Dei, qui eódem minimórum corde cupit speráre eosdémque in consílium suum salútis compéllit. Quanto púlchrius propósitum tanto maior spes. Et revera, uti Papa éxplicat, sic procedit mundus, spe multórum simplícium impúlsus, qui ignóti sunt præter quam Deo et, ómnibus difficultátibus mínime obstántibus, in crástinum meliórem diem credunt, cum futúrum sciant in mánibus esse spem máximam eis offeréntis.
NOTITIAE BREVIORES
In catechési in Audiéntia Generáli hábita, Leo Quartus Décimus, último die anni bismillésimI vicésimi quinti, adhortátus est nos ad meditánda ea, quæ Dóminus pro nobis fecit anno prætérito, sicut et ad sincéram recognitiónem nostri agéndam, ad responsiónem nostram donis eius recenséndam et ad véniam peténdam quotienscúmque non valúimus plúrimi fácere afflátus eius et quam mélius taléntis uti, quæ Ipse nobis commísit.
Ántequam vos salutémus, univérsi offícii nómine, faustum felicémque Annum Novum ex corde vobis exoptámus. Finis fit hic loquéndi. Cétera nova próxima hebdómada. Valéte!
